Siglir tar il cuntegn
cuntegn

Exteriur Gunter Gabriel è mort

Gabriel è mort pervi da las consequenzas d'ina crudada giu d'ina stgala. Il chantadur tudestg fascheva musica da Country e Schlager.

Purtret da Gunter Gabriel.
Legenda: Gunter Gabriel è mort curt suenter ses 75avel anniversari. Keystone

Gunter Gabriel saja stgarpitschà ils 10 da zerclacur sin ina stgala da crap. Entras crudar ha Gabriel rut ses emprim spinal dal culiez trais giadas. En in ospital a Hannover saja el vegnì operà trais giadas. Ma oz suentermezdi haja ses cor challà da batter.

Gabriel è vegnì enconuschent en ils onns 70 cun hits sco «Er ist ein Kerl (Der 30-Tonner Diesel)» ni «Hey Boss, ich brauch mehr Geld». Per ses fans è el stà il Johnny Cash tudestg. Gest ils ultims onns aveva Gabriel era sa concentrà fitg sin la musica da lez. Dasper tribuna ha il chantadur che ha vivì ditg sin ina bartga-chasa a Hamburg procurà per bleras lingias grossas. Quai pervi dad alcohol, insolvenza e problems da la sanadad.

La vusch dals manischunz da camiuns

Gunter Gabriel ha tgirà ses image sco idol dals camiunists. "In tec macho, in tec punk, in tec proll", uschia veseva Gabriel sa sez. Al success dals onns 70 è suandà la crudada dals onns 80. Nagins novs hits, sias letgs èn idas dapart, tar immobiglias ha el speculà fauss ed ha pers milliuns. Adina puspè è el dentant turnà sco musicis.

RR novitads 17:00