Siglir tar il cuntegn
Inhalt

Exteriur Guatemala suonda a Trump

Guatemala suonda sco emprim pajas a la dispitaivla decisiun dal president dals Stadis Unids Donald Trump. Uss renconuscha era Guatemala la citad da Jerusalem sco citad principala d'Israel.

Bandiera da Guatemala avant il National Palace a Guatemala.
Legenda: La Guatemala renconuscha Jerusalem sco chapitala da l'Israel. Reuters

Il president da la Guatemala, Jimmy Morales, haja ordinà da dischlocar l'embassada da Tel Aviv a Jerusalem. Quai ha il president communitgà via Twitter.

Pir la gievgia aveva la radunanza plenara da las Naziuns Unidas condemnà cler la decisiun dispitaivla dals Stadis Unids. Per tala resoluziun betg lianta han 128 dals 193 stadis commembers vuschà. Nov pajais, uschia era la Guatemala , han vuschà cunter. 35 pajais èn s'abstenids da lur vusch.

Trump aveva avertì auters pajais da vuschar cunter ils Stadis Unids a la radunanza plenara da las Naziuns Unidas. El aveva smanatschà da sminuir las contribuziuns finanzialas.

Tge che pertutga il conflict dal Proxim Orient è la dumonda dal status da Jerusalem fitg delicata. Tant l'Israel sco era ils Palestinais pretendan Jerusalem sco lur chapitala. Crititgada vegn la decisiun da Trump perquai ch'el haja uschia engrevgià las activitads en favur da la pasch en il conflict dal Proxim Orient.

RR novitads 06:00