Siglir tar il cuntegn

Exteriur Guardia costala taliana salva passa 1'000 fugitivs

La guardia costala taliana ha salvà la dumengia en la Via da Sicilia radund 1’100 fugitivs ord la Mar Mediterrana. Dapi la cunvegna tranter l’UE e la Tirchia emprovan adina dapli umans d’arrivar en l’Europa sur la mar.

Ils migrants eran en viadi en pliras bartgas.
Legenda: Ils migrants eran en viadi en pliras bartgas. Keystone

La guardia costala ha salvà la dumengia radund 1’100 fugitivs ord bartgas sin la Mar Mediterrana. Els sajan vegnids spendrads en la Via da Sicilia ord otg bartgas da gumma, duas navettas ed ina bartga pli gronda, communitgescha la guardia costala. Davart la derivanza dals fugitivs n’han las autoritads fatg naginas indicaziuns.

Passa 2'700 morts sin la mar il 2016

Tenor dumbraziuns da l’Organisaziun internaziunala per migraziun èn radund 105’000 fugitivs arrivads en l’Italia cun bartga. Blers dals fugitivs èn partids da la Libia.

Dapli che 2’700 migrants èn morts durant la traversada en bartgas ch’eran il pli surchargiadas. Tenor organisaziuns d’agid è la via sur mar tranter la Libia e l’Italia entant la pli impurtanta ruta per fugitivs en viadi vers l’Europa.