A Facebook vegn renfatschà da betg avair prendì serius avunda il privel che datas dad utilisaders pudessan vegnir en ils mauns da terzs. Uschia haja Facebook cugliunà il parlament.
Investigaziuns èn instradadas
La nova affera da datas enturn Facebook e las elecziuns presidialas 2016 en ils Stadis Unids duai vegnir examinada, e quai da diversas varts. La procura publica dal stadi Massachusetts ha instradà investigaziuns cunter l'interpresa d'analisar datas Cambridge Analytica. Lezza duai avair analisà illegalmain las datas persunalas da 50 milliuns users da Facebook. La firma ha tranter auter lavurà per il team electoral dal president american, Donald Trump. Ins spetgia bainbaud respostas da l'interpresa sco era da Facebook ha communitgà la procuratura generala.
L'autoritad da la protecziun da datas da la Gronda Britannia ha annunzià in'examinaziun, co Facebook va enturn cun las datas da ses clients.
RR novitads 06:00