Exteriur - Gronda Britannia – midada en la Downing Street Nr. 10 - Novitads

Exteriur Gronda Britannia – midada en la Downing Street Nr. 10

Il primminister David Cameron va, la primministra Theresa May vegn. Il Brexit ha squassà la politica britannica. Il midament a la testa da la regenza e da la partida conservativa è succedì bler pli spert che annunzià. Era tar la partida da Labour datti grond moviment.

La politica da la Gronda Britannia vegn vinavant squassada da las consequenzas dal Brexit.

audio

Mezdi: May succeda a Cameron

ord Actualitad dals 13.07.2016.

laschar ir. Durada: 1 minuta 11 Secundas.

Suenter ch’il primminister David Cameron aveva annunzià da sa retrair da ses uffizi e da far quai in october s’ha midada la situaziun da fund si.

Mo 20 dis pli tard vegn cun Theresa May gia a prender plaz sia successura en la Downing Street Nr. 10.

Ils «tories» fan tempo

Uschia ha la partida conservativa, ils «tories», fat tempo. L'elecziun da May era succedida anc il glindesdi mo paucas uras suenter che sia unica concurrenta, Andrea Leadsom, era sa retratga surprendentamain spert da sia candidatura.

Cun May maina suenter Margaret Thatcher per la segunda giada ina dunna la Gronda Britannia.

Labour è en discordia - probablamain Corbyn vs. Eagle

Era tar la Labour, sper il conservativs ed ils liberaldemocrats l’autra gronda partida britannica, datti grond moviment. Quai è sa mussà in mardi saira ad ina sesida dal uschenumnà comité executiv da la partida. Il schef da partida Jeremy Corbyn è sut squitsch massiv. El vegn a sa stuair mesirar en ina consultaziun da basa cun l’opponenta Angela Eagle.

RR novitads 12:00