438 deputads da la chombra da deputads han vuschà per novas elecziuns e be 20 cunter. La regenza dal primminister Boris Johnson è uschia vegnida tras cun sia proposta da far ils 12 da december elecziuns anticipadas.
L'opposiziun che vuleva novas elecziuns gia ils 9 da december, n'ha betg gì success. Er la dumonda da midar il dretg d'eleger britannic, n'ha betg chattà ina maioritad en il parlament. L'opposiziun vuleva il dretg d'eleger er per giuvens da 16 e 17 onns sco er per vischins da l'UE che vivan gia pli ditg en la Gronda Britannia.
Johnson dovra maioritad per realisar il Brexit
Il primminister Boris Johnson spera da cuntanscher en las elecziuns dal december ina maioritad per finalmain pudair purtar il pajais or da l'UE. Sia partida conservativa n'ha actualmain numnadamain nagina maioritad en la chombra da deputads.
RR novitads 06:00