Siglir tar il cuntegn
cuntegn

Exteriur Gronda Britannia bandegia 23 diplomats russ

La Gronda Britannia chatscha 23 diplomats russ ord il pajais. Quai sco reacziun sin l’attatga cun tissi sin l’anteriur spiun russ Sergei Skripal. Ils diplomats hajan peda in’emna da bandunar la Gronda Britannia, ha ditg Theresa May.

purtret da la primministra britannica Theresa May
Legenda: La primministra britannica Theresa May ha annunzià las mesiras. Keystone

Avant aveva la Russia laschà passar in ultimatum da la Gronda Britannia che pretendeva da sclerir l’attentat. Moscau refusa las renfatschas e smanatscha medemamain cun sancziuns.
Plinavant ha la Gronda Britannia annunzià da metter sin glatsch ils contacts bilaterals cun la Russia. Uschia è vegnida retratga ina invitaziun la minister da l’exteriur Sergej Lawrow.

Il cas Skripal

Ils 4. da mars han ins chattà Skripal (66onns) e sia figlia da 33 onns senza schientscha sin in baun en in parc en la citad pitschna Salisbury. Omadus èn anc adina en in stadi critic. Sco officier dal servetsch secret russ aveva Skripal spiunà per la Gronda Britannia e sentenzià en la Russia. Il 2010 è el vegnì relaschà en la Gronda Britannia en in'acziun da barat d'agents.

RR novitads 15:00