David Amess è vegnì mazzà venderdi d'in attatgader en ina baselgia en il contadi dad Essex. Emprimas investigaziuns avevan mussà ch'ina motivaziun en connex cun extremissem islamic pudess esser involvida. En connex cun questas investigaziuns dettia er perquisiziuns en dus lieus a Londra. L'attatgader da 25 onns è sin il post da polizia. Tenor las enconuschientschas d'enfin uss, haja quel agì sulet.
Amess è vegnì mazzà durant ch'el era vid s'inscuntrar cun il pievel en ses circul d'elecziun ad Essex. El è mort anc al lieu, malgrà tuttas stentas dals sanitaris. La polizia ha arrestà l'attatgader e confiscà il cuntè.
Il primminister Boris Johnson è stà fitg commuentà da l'attatga sin ses ami en la partida. Amess saja stada ina da las persunas las pli amablas e gentilas en la politica. Er dal manader da l'opposiziun Keir Starmer hai dà pleds da cordoli per sia famiglia e ses collavuraturs.
Nauschas regurdientschas
L'attatga sin Amess fa endament ferm l'attatga sin la deputada dals Labours, Jo Cox, ch'è vegnida mazzada il 2016. Er ella durant in inscunter cun il pievel en ses circul d'elecziun. L'attatgader era da la dretga extrema ed ha sajettà sin ella, sco er attatgà ella cun in cunté. Cox è morta curt suenter vi da sias blessuras. Il murdraretsch vi da Cox era capità be paucas emnas avant il referendum dal Brexit.