Siglir tar il cuntegn
Inhalt

Exteriur Gronda Britannia: Amber Rudd ha demissiunà

La primministra Theresa May ha puspè pers in commember dal cabinet: Amber Rudd è sa retratga suenter ch'ella era vegnida sut squitsch pervia d'in scandal.

Amber Rudd.
Legenda: Amber Rudd è gia la sisavla delegada che demissiunescha suenter las elecziuns il 2016. Keystone

Suenter il scandal en connex cun immigrants da la Caribica è la ministra sa retratga. La primministra britannica Theresa May ha acceptà la decisiun.

Sut squitsch era ella vegnida perquai ch'ella aveva snegà avant il parlament ch'i dettia quotas per repatriaments da persunas da la Caribica. Silsuenter èn dentant vegnids publitgads documents che cumprovan il cuntrari.

Dapi il 2016 en uffizi

La dunna ch'ha avant lavurà en il sectur da bancas è stada en uffizi dapi il fanadur 2016. Ella vala sco politicra cun ina tenuta positiva envers l'Uniun europeica ed ha gì ina rolla principala en il cabinet en connex cun la definiziun dal curs dal Brexit.

Rudd è gia la 5avla persuna che sa retira da la regenza dapi las elecziuns il zercladur passà. May aveva gia stuì dir adia al minister da l'exteriur Michael Fallon, al viceschef da la regenza Damian Green e da la ministra per l'agid al svilup Priti Patel. Questas demissiuns èn tuttas succedidas a basa da scandals. Sulet il minister da l'Irlada dal Nord James Brokenshire è ì per auters motivs.

RR novitads 06:00