Il center da Chios sa chatta datiers da l’eroport en ina veglia fabrica e po prender si 1'100 persunas. Sco HELPE scriva, hajan ins installà 67 abitaziuns da container. Ensemen cun il militar e las autoritads sajan vegnidas reparadas la chanalisaziun ed il provediment d’aua e d’electricitad.
Dus centers en funcziun, trais suondan
Totalmain ha la Grezia planisà d’endrizzar tschintg centers da registraziun. Tenor plan duessan quels gia esser en funcziun dapi la fin dal 2015. Dasper ils centers a Chios e Lesbos èn actualmain en construcziun ils centers sin las inslas Samos, leros e Kos.
L'insla Chios è mo stgars 7 km davent da la costa tirca. Tenor l'ovra d'agid per fugitivs da l'ONU, l'UNHCR, èn dapi l'entschatta da quest onn arrivads passa 44'000 fugitivs da la Tirchia sin l'insla Chios.
Unda da fugitivs da Tirchia en Grezia na tschessa betg
Paucs dis avant che la NATO cumenza ses engaschi cunter ils deportaders en la Mar Egeica, cuntinuescha l'unda da fugitivs da la Tirchia en la Grezia. Dapi l'entschatta da l'onn èn bunamain 77'000 migrants arrivads ord la Tirchia sin las inslas grecas, communitgescha l'UNHCR.
Ils pli blers fugitivs derivan da la Siria. Ils emprims dus mais da l'onn passà eran radund 4'500 migrants arrivads en Grezia. Tenor l'organisaziun internaziunala per migraziun èn dapi l'entschatta da l'onn morts almain 320 migrants en la mar.
RR novitads 06:00 / 12:00