Siglir tar il cuntegn

Exteriur Grezia para da sa revegnir

Las vistas finanzialas per il stadi grec sajan positiva, communitgescha l'agentura da rating «Fitch». L'economia creschia ed ils ristgs politics sa reduceschian.

bursa dad athen davos bandiera da la grezia
Legenda: Las grondas agenturas da rating «Fitch» e «Standard &I Poor's» han curregì ensi la bonitad da la Grezia – L'economia creschia e la politica spargnia. Keystone

La creschientscha economica en la Grezia saja duraivla ed ils ristgs sa sminueschian, quinta l'agentura da rating «Fitch». La regenza procuria per plientradas e spargnia vinavant. Il schaner aveva l'agentura da rating «Standard & Poor's» era auzà la bonitad da la Grezia da «B-» sin «B».

Grond effect n'ha questa promoziun però betg per la Grezia. Investiders conservativs eviteschan anc adina la Grezia. Ils emprests da stadi da lunga durada valan anc adina pauc. «Fitch» quinta cun ulteriuras mesiras da levgiament en connex cun ils debits da la Grezia tar la gruppa da crediturs europeics.

Grezia anc adina dependenta e plain debits

Dapi la crisa finanziala dal 2010 dependa la Grezia da crediturs internaziunals. Il terz pachet d'agid da radund 100 milliardas francs scada cun la fin d'avust. La regenza greca vul suenter puspè procurar per daners sin ils martgads da finanzas.

RR novitads 11:00