Siglir tar il cuntegn
Inhalt

Exteriur Grezia na vul nagins daners dal Fond monetar internaziunal

La rechapitalisaziun da las bancas ha custà damain che budgetà. Las refurmas e mesiras da spargn che l'IWF pretenda dal pajais èn tenor Alexis Tsipras fitg rigurusas.

Il primminister grec Alexis Tsipras.
Legenda: Tenor il primminister Alexis Tsipras dovra la Grezia damain agid finanzial che spetgà. Keystone

Il primminister grec Alexis Tsipras vul desister da daners ord il Fond monetar internaziunal IWF. La Grezia dovria il mument damain daners ord il fond d’agid monetar, ha ditg Tsipras en in intervista a la televisiun greca.

Ultra da quai saja la posiziun da l'IWF pauc constructiva, perquai ch’el pretendia dal pajais il medem mument refurmas pli diras e la capacitad da purtar ils debits.

Ils crediturs internaziunals avevan concedì il fanadur totalmain 86 milliardas euros. Tranter quels 25 milliardas euros per rechapitalisar las bancas. La fin finala èn dentant mo 5,7 milliardas euros stads necessaris per quest intent.

L’IWF ha annunzià da vulair decider davart ina participaziun a l'agid finanzial per la Grezia il schaner da l'auter onn. Enfin uss han sulettamain ils partenaris europeics pajà daners a la Grezia. Mardi proxim examineschan ils crediturs internaziunals las refurmas e mesiras da spargn da la Grezia.

RR novitads 08:00