Siglir tar il cuntegn
cuntegn

Exteriur Grezia empè Tunesia

Bleras Svizras ed Svizzers han stornà u midà las vacanzas gia cudeschadas en Tunesia. Quai mussan retschertgas da l’agentura da novitads svizra tar differents biros da viadi.

vacanzas sper la mar
Legenda: La Grezia profitescha dal fatg che blers turists cudischeschan enturn lur vacanzas en Tunesia. Keystone

Ils blers biros da viadi sa mussan il mument culant tar viadis gia cudeschads en Tunesia. Suenter l’attatga terroristica d’avant 2 emnas a Sousse cun 39 morts, pon vacanzas en Tunesia vegnir stornadas u midadas gratuitamain.

Blers prendian la chaschun da midar las vacanzas. Oravant tut la Grezia profitescha da quai, malgrà la crisa da finanzas. I na dettia nagin motiv dad esser malsegir. Sin las inslas grecas giaja tut normal, tenor Hotelplan Suisse. Plazzas aviaticas, hotels ed ustarias sajan averts, il provediment cun aliments saja garantì.

La confederaziun n’ha enfin uss anc betg recumandà a turists svizzers da bandunar la Tunesia. Perencunter vul la Gronda Britannia far turnar a chasa las proximas 48 uras plirs 1’000 turists che sa chattan il mument en Tunesia en vacanzas.