Siglir tar il cuntegn

Exteriur Grezia cuntinuescha cun repatriament da migrants

La Grezia cuntinuescha puspè cun il repatriament da fugitivs en la Tirchia. Ina navetta cun 45 migrants dal Pakistan a bord haja bandunà l’insla Lesbos, rapportan medias statalas.

Migrant ch'observescha co ina navetta banduna il port.
Legenda: Sunter in'interrupziun da plirs dis cuntinuescha il repatriament da migrants. Keystone

Ils umens n’han tenor indicaziuns da l’agentura per la protecziun da cunfin Frontex betg tschentà ina dumonda d’asil. Dapi il glindesdi èsi l’emprim repatriament. Lura eran bun 200 fugitivs vegnids transportads da la Grezia en Tirchia, quai en il rom da la cunvegna tranter l’Uniun europeica e la Tirchia.

Protests d'activists e migrants

Ils novs transports da repatriament èn vegnids accumpignads da protests d'activists. Quels crititgeschan l'agir sco «deportaziun». Il di avant aveva quai dà protests da migrants sin las inslas Chios e Samos. Els levan sa defender cunter lur repatriaziun en Tirchia.

RR novitads 14:00