Siglir tar il cuntegn
Inhalt

Exteriur Grevas malauras han puspè tutgà l'Austria

La notg sin venderdi hai puspè daratgà fermamain en l'Austria. Tenor la centrala per meteorologia e geodinamica haja il vent buffà cun enfin 130 kilometers l'ura tras il pajais.

Purtret da pumpiers che taglian si ina plonta derschida.
Legenda: Pervi da plantas derschidas e bovas han ils pumpiers gì da lavurar tutta notg. Keystone

Ils pumpiers sajan stads en acziun pervi da bovas, plantas derschidas e vias inundadas. En plirs pajais federativs haja dà interrupziuns tar ils trens. Gia avant in'emna ha l'Austria gì da cumbatter cunter grevas malauras.

Bovas e plantas derschidas

Sin in campadi a Kärnten sajan, tenor polizia derschidas pliras rulottas. Trais persunas, tranter quellas in uffant sajan vegnidas blessadas da roms che sajan crudads giu. En las vischnancas da Lurnfeld e Sachsenburg sajan plirs tetgs vegnids stgarpads davent da las chasas ed autos sajan vegnids donnegiads entras plantas derschidas. Er lingias electricas sajan vegnidas donnegiadas.

Autostrada A4 ha stuì vegnir serrada

Pervi da donns haja er dà plirs disturbis tar colliaziuns da trens a Niderösterreich. Plinavant saja l'autostrada da l'ost, A4 stada serrada pliras uras pervi da plantas che bloccavan la via. Era bovas en il Tirol e Salzburg han manà a plirs disturbis.

Er a Vienna hajan ins sentì las malauras. La polizia saja vegnida clamada passa 200 giadas. Sur tut pervi da plantas derschidas.

RR novitads 10:00