Siglir tar il cuntegn
Inhalt

Exteriur Giapun: Imperatur Akihito (83) dastga abditgar

L'imperatur giapunais Akihito dastga abditgar. Il parlament giapunais ha dà suatientscha al giavisch dal monarc e deliberà ina lescha speziala correspundenta.

Akihito en ses messadi.
Legenda: Ils 8 d'avust 2016 aveva Akihito dumandà en in messadi da video da pudair abditgar - uss dastga el. Keystone

Cun sia decisiun segua la chombra dals cussegl a quella da la Chombra dals represchentants da l’emna passada. Akihito po uschia ascender dal uschenumnà «tron da crisantemas» il december da l'auter onn a ses 85avel anniversari.

Permis per Akihito pir suenter emnas da consultaziun

Cun Akihito abditgescha in imperatur fitg popular ch’è s’engaschà durant 30 onns per ses subdits. Suenter differentas operaziuns tema Akihito, da betg pli pudair far quai commensuradamain ed ha dumandà en in messadi da video – rar – da pudair abditgar.

La populaziun s’ha mussada perencletga, la cumissiun da la regenza ha stuì tractar durant pliras emnas per vegnir al medem resultat.

Problem betg evas, ma spustà

Suenter l’abidcziun dad Akihito (83) vegn ses figl Naruhito (57) a surprender il tron. L’avegnir da la pli veglia monarchia ereditara en il mund n’è dentant betg segirà: I mancan ils ereditars masculins.

L’excepziun da pudair abditgar vala be per Akihito (83). Sch’er ses figl e suczessur Naruhito (57) vuless surdar l’onur dad esser imperatur avant ch’el mora a ses figl Hisahito (10), cumenzass tut la procedura danovamain.

RR novitads 06:00