Elecziun dal president
Las meglras schanzas per succeder a Sepp Blatter sco president da la FIFA han gì dus umens. Ina giada il schaic Salman bin Ibrahim al-Chalifa dal Bahrain, e da l’autra vart il Vallesan Gianni Infantino. Ils 3 ulteriurs candidats avevan sulettamain schanzas teoreticas. Per in è il viadi gia a fin: Toyko Sexwale aveva retratg sia candidatura curt avant l'emprim scrutini.
Successiun d'Infantino tar l'UEFA
L'UEFA vegn a decider il venderdi davart in successur da ses secretari general da fin qua, Gianni Infantino. Suenter si’elecziun sco nov president da la FIFA sto Infantino immediat dar giu ses post tar l'uniun tetgala europeica.
Sco favurit per l'uffizi da l'UEFA vala ses substitut Theodore Theodoridis. Il Grec vala sco confident d'Infantino ch'ha er sustegnì el durant il cumbat electoral per la FIFA. Ina nov'elecziun dal president fa l'UEFA dependent dal resultat en il cumbat giuridic da Michel Platini per sia suspensiun da 6 onns.
Ils presidents da la FIFA dapi 1904
Num | Pajais | Temp d'uffizi |
---|---|---|
Robert Guerin | Frantscha | 1904-1906 |
Daniel Burley Woolfall | Gronda Britannia | 1906-1918 |
Jules Rimet | Frantscha | 1921-1954 |
Rodolphe William Seeldrayers | Belgia | 1954-1955 |
Arthur Drewry | Gronda Britannia | 1955-1961 |
Sir Stanley Rous | Gronda Britannia | 1961-1974 |
João Havelange | Brasilia | 1974-1998 |
Joseph Blatter | Svizra | 1998-2016 |
Issa Hayatou (interim) | Camerun | 2015-2016 |
Gianni Infantino | Svizra | 2016 |
Vista finanziala intscherta
Al cumenzament dal congress da la FIFA ha il secretari general Markus Kattner discurrì dad in grev ambient per la Federaziun da ballape internaziunala. Pervi da las rinfatschas da corrupziun vegnia la FIFA a far in perdita da 550 milliuns francs fin il 2018. Ina tala sperdita reduciss il polster finanzial da la federaziun da 1,5 milliardas francs per radund in terz. L’onn passà avevan plirs sponsurs la collavuraziun cun la FIFA.
Pachet da refurmas approvà
Sut il grond squitsch da la giustia americana e dals sponsurs ha la FIFA, suenter debattas sur plirs onns, refurmà ses statuts. Il congress en il Hallenstadion a Turitg ha ditg gea al pachet da refurmas. Las refurmas, che limiteschan il temp d’uffizi e restrenschan la pussanza dal president e che furman in nov cussegl per il comité executiv, han survegnì las trais quartas da las vuschs necessarias.
Tut en tut han 179 da 207 federaziuns naziunalas ditg gea a las refurmas. Cun questa refurma vul la FIFA separar il nivel da decisiun politic cun l’economic. La critica ch’ins ha spetgà ord las retschas da l’Africa e da l’Asia n’è betg sa manifestada. 22 federaziuns han vuschà cunter il pachet, 6 federaziuns n’han dà giu nagin votum.
Nus stuain dar in messadi al mund, in messadi da l’unitad.
Avant la decisiun aveva il president ad interim Issa Hayatou appellà a las federaziuns naziunalas, da sustegnair las restructuraziuns necessarias. La FIFA cumenzia ses viadi cun la finamira da restabilir la confidenza, ha el ditg. Hayatou ha remplazzà Sepp Blatter, il president dispensà.
Ina vusch critica
Critica publica hai dà sulettamain da la Federaziun da la Palestina al congress a Turitg. Per la Palestina na van la midadas betg lunsch avunda. «Questas refurmas pericliteschan l’avegnir da la FIFA. Ellas van en la fallida direcziun. Il president, il secretari general ed il concil survegnan anc dapli pussanza, i na dat nagina cuntrapaisa. I na dat nagina vaira transparenza», ha ditg il secretari general da la Federaziun da la Palestina, Gonzalo Boye Tusset.
RR novitads 11:00+