Germanwings: Lufthansa porscha agid als confamigliars

La societad aviatica Lufthansa porscha agid transitoric als confamigliars da las unfrendas da la disgrazia d'aviun da la Germanwings.

Aviuns da la Germanwings a l'eroport.

Legenda da maletgs: La Lufthansa sto far quint cun massivas summas d'indemnisaziun per las unfrendas da la crudada d'aviun da sia societad affiliada Germanwings. Keystone

Ils daners duain esser ina sort d'emprim agid, independent dad ulteriuras indemnisaziuns pussaivlas. Il mument saja previs da pajar enfin 50'000 euros per famiglia, ha confermà ina pledadra da Germanwings. Quests daners na stoppian betg vegnir pajads enavos. Experts d'aviatica però quintan cun pretaisas d'indemnisaziuns bler pli autas.

Lufthansa sto star buna per la disgrazia

La societad mamma stoppia star buna per il cumportament da ses pilot. Quai per ses agir per negligientscha ed intenziunà. Latiers ha la Lufthansa però ina protecziun da l’assicuranza. Experts quintan uschia he che las pretaisas d’indemnisaziun na sforzian betg en la schanuglias ina societad sco la Lufthansa.

5avel di da tschertga

En las Alps franzosas ha cumenzà il tschintgavel di da tschertga da las unfrendas da la disgrazia d'aviun da Germanwings.

Dasper il salvar ed identifitgar las baras sa concentreschan las forzas da salvament viavant sin segirar il lieu da disgrazia e sin chattar la segunda black-box che duai dar ulteriur scleriment davart la crudada.

RR novitads 06:00/10:00