Siglir tar il cuntegn

Header

cuntegn

Exteriur Germania: Uss pon era pèrs omosexuals maridar

Il Bundestag, il parlament tudestg, ha lubì l'uschenumnada letg per tuts. Tenor agenturas da novitads tudestgas in pass istoric per la Germania nua che lètgs tranter omosexuals eran ditg scumandadas da la lescha anor.

Fin ussa han pèrs omosexuals dastgà registrar in partenadi da vita en Germania, betg però maridar. La differenza è che pèrs maridads dastgan adoptar ensemen uffants. Per la lètg per tuts èn stads ils socialdemocrats, ils verds e la sanestra. Ils cristiandemocrats èn stads per gronda part cunter. Er la chanceliera Angela Merkel ha votà encunter.

Ina lunga via a la lètg per tuts

Pir a partir da l'onn 1994 n'è la omosexualitad betg pli vegnida chastiada, sa basond sin l'artitgel 175 dal cudesch da dretg penal. Durant la persecuziun sut ils il reschim dals naziunalsocialists (enturn 1935) èn passa 50'000 umens omosexuals vegnids sentenziads tenor quest paragraf. Tranter 10'000 e 15'000 èn vegnids maltractads en ils champs da concentraziun. Tant la Republica Federala tudestga sco er la DDR ha surpiglià l'artitgel 175.

Anc l'emna passada ha il parlament tudestg reabilità victimas da la giustia. Persunas pertutgadas survegnan ina indemnisaziun da 3'000 euros e 1'500 euros per mintga onn ch'insatgi è stà en praschun.

RR novitads 11:00

Artitgels legids il pli savens