Siglir tar il cuntegn
Inhalt

Exteriur Germania sa renda en cumbat cunter Stadi Islamic

La regenza tudestga ha decis da sa participar al cumbat cunter la milissa da terror Stadi Islamic cun l’armada. Fin 1’200 schuldads duain far part a las acziuns militaras.

Schuldads da la Bundeswehr.
Legenda: Engaschi militar pervi da privel global tras il Stadi Islamic: La Bundeswehr duai cumbatter la milissa terroristica. Keystone

La regenza tudestga aveva empermess lur sustegn a la Frantscha suenter ils attentats dal SI a Paris.

Attatgas ord l'aria e sustegn per portaviuns franzos

En detagl vul la Germania sa participar ad attatgas ord l’aria cunter il Stadi Islamic en la Siria ed en l’Irac. L’engaschi planisà da la Bundeswehr è la resposta tudestga sin las attatgas terroristicas a Paris d’avant bun duas emnas. Suenter il cabinet sto er anc il Bundestag approvar l’engaschi militar.

A l’entschatta duai l’engaschi esser limità sin in onn. Ina tala limita è usitada tar mandats per acziuns en l’exteriur. La Bundeswehr duai duvrar plirs aviuns da retschertga dal tip «Tornado».

Plinavant èsi planisà da sustegnair in portaviuns franzos cun in bastiment da guerra.

RR novitads 11:00