Siglir tar il cuntegn
Inhalt

Exteriur Germania decida grond pachet da mesiras

En Germania è la coaliziun da la regenza sa cunvegnida ad in pachet da mesiras per la politica d'asil. Cun il pachet da mesiras vul la regenza dumagnar sut controlla il provediment e l'alloschi dals fugitivs.

fugitivs
Legenda: L'agid per ils fugitivs duai vegnir augmentà per 6 milliardas euros. Keystone

Tranter auter duai l'agid per ils fugitivs vegnir augmentà per 6 milliardas euros, hai gì num a Berlin. Per requirents d’asil duain valair per part reglas pli severas. Il basegn da daners en indrizs d’emprima registraziun duai vegnir remplazzà uschè lunsch sco pussaivel cun prestaziuns materialas, prestaziuns socialas duain vegnir reducidas per intginas categorias da requirents.

3'000 policists dapli

Plinavant duai la gruppa dals uschenumnads «pajais da derivanza segirs» vegnir extendida sin il Cosovo, l'Albania ed il Montenegro. Cun questa classificaziun pon requirents d'asil vegnir tramess enavos pli spert en lur patria. Il pachet da mesiras prevesa però era da stgaffir 3’000 ulteriuras plazzas da policists.

RR novitads 6:00