En Germania ha Armin Laschet fatg la cursa per il presidi da la CDU. En l'elecziun decisiva ha il primminister da Nordrhein-Westfalen fatg las pli bleras vuschs ed è elegì sco nov schef e successur da Annagret Kramp-Karrenbauer. Al di da partida digital ha il politicher da 59 onns survegnì 521 vuschs, ses cuntracandidat ed anteriur schef da fracziun Fredrich Merz ha survegnì 466 vuschs. Il terz candidat, Norbert Röttgen, era crudà or en l'emprima runda. En lezza aveva Merz anc fatg las bleras vuschs. Blers aderents da Röttgen dals 1'001 delegadas e delegads han lu dà lur vusch a Laschet.
Appel da serrar las retschas
Suenter sia victoria ha Armin Laschet appelà da tegnair ensemen.
Jeu vi far tut che nus giain communablamain tras quest onn.
La CDU stoppia avair success en las elecziuns dal Landtag e tar la proxima elecziun dal Bundestag puspè procurar che la Union mettia il proxim chancelier. Suenter l'elecziun digitala suonda anc in'elecziun per posta nua che las delegadas ed ils delegads ston eleger lur schef da partida a scrit. Il resultat definitiv e liant dat la CDU enconuschent ils 22 da schaner.
Trais sfidas immensas
Sco nov schef da la CDU stat Laschet gist avant trais incumbensas grondas. Suenter sia victoria cunter Merz sto el guardar che la partida na va betg dividida en las campagnas d'elecziun per il Bundestag e sis elecziuns dal Landtag. Il medem mument sto el metter ensemen ina squadra en la direcziun da la partida cun chaus prominents e ch'emplaina ils cuntegns dals temas centrals dal cumbat electoral. Vitiers sto el e la CDU anc sclerir la dumonda tgi che duai candidar sco successur dad Angela Merkel sco chancelier. Sche Laschet vul encorunar sia carriera politica sto el gudagnar dapli popularitad ed el sto sa cunvegnir davart la candidatura da chancelier cun Markus Söder, il schef da la CSU che ha tenor las enquistas il pli grond sustegn en la populaziun.
Merz vul daventar minister d'economia
Suenter sia terrada cunter Laschet per il presidi da la partida vul Friedrich Merz daventar minister d'economia da la Germania. Sin Twitter ha Merz scrit ch'el haja offrì a Laschet d'entrar en la regenza tudestga e da surpigliar il ministeri d'economia. In pledader da la chanceliera Angela Merkel ha fatg a savair che Merkel na quintia betg da midar ses cabinet. Actualmain è Peter Altmaier (CDU) minister d'economia da la Germania.