Siglir tar il cuntegn
Inhalt

Exteriur Garda naziunala franzosa cunter terror

Sco reacziun sin las attatgas terroristicas duai la garda naziunala franzosa cumpigliar en 3 onns 84’000 reservists. Quai ha ditg il minister da l'intern Bernard Cazeneuve suenter ina sesida dal cabinet da segirtad.

Militar franzos vid far patruglia a la costa da la mar.
Legenda: La nova garda naziunala duai sustegnair il militar en il cumbat cunter il terror. Keystone

La garda naziunala possia lura surpigliar ils engaschis anti-terror en l'intern ch'il militar aveva fin ussa. Fin a 10’000 schuldads patruglieschan actualmain tras las citads franzosas.

Il president franzos François Hollande aveva menziunà l'idea d'ina garda naziunala gia suenter las attatgas da Paris il november passà. L'emna passada ha el annunzià uffizialmain da crear quella uschè svelt sco pussaivel.

Millis guardians a Londra

Ed er en la Gronda Britannia han las attatgas terroristicas en Frantscha e Germania consequenzas. La tema d'ina attatga a Londra crescha medemamain. Sco Scotland Yard ha communitgà hajan uss ils emprims dals 600 policists armads supplementars cumenzà lur servetsch a Londra.

Entaifer 2 onns duain en tut 2’800 guardians armads patrugliar en la vias da Londra.

RR novitads 15:00