En ina discussiun al podium d’avant intgins onns ha Samih Sawiris raquintà l’istorgia da sia famiglia. Ses bab, Onsi Sawiris, ha fundà gia cun 20 onns ina fatschenta da bajegiar en l’Egipta. L'onn 1961 – sut il president Gamal Abdel Nasser – èn els sco Famiglia Copta vegnids sut squitsch. La firma è vegnida surpigliada dal stadi ed els han stuì fugir en la Libia.
Sco quai che Samih Sawiris ha raquintà, aveva ses bab dentant segirà la facultad en furma da daners en l'exteriur. Uschia è la partenza en la Libia sut il retg Sidi Muhammad Idris stada pli simpla. Onsi Sawiris ha puspè bajegià si in imperi da construcziun. Quai ha cuzzà fin che Muammar al Gaddafi è a la fin dals onns 1960 vegnì a la pussanza en la Libia. Puspè ha la famiglia stuì laschar enavos lur possess e scappar.
Enavos en l'Egipta ha Onsi Sawiris puspè fundà ina firma da bajegiar e pli tard expandì en la branscha da turissem, computers e telefonia mobila: Uschia èn ils Sawiris daventads ina da las pli grondas interpresas da l’Egipta. Quella vegn anc oz manada da ses trais figls.