En il champ da fugitivs improvisà a Calais en Frantscha s’intensivescha la situaziun. En il champ vivian actualmain fin 9'000 persunas, pia 2'000 dapli ch’anc il fanadur. Quai han communitgà duas organisaziun d’agid.
L’atmosfera en il champ en il nord dal pajais saja fitg tendida. Tenor la regenza franzosa èn uffizialmain 4’500 persunas en il champ. Entant haja la polizia annunzià da far in’atgna dumbraziun ils proxims dis. Ils fugitivs emprovan d’arrivar da la Frantscha en la Gronda Britannia.
Dapli fugitivs en l'Italia
Il fanadur èn puspè dapli fugitivs arrivads sur la Mar Mediterrana en l’Italia. Tenor indicaziuns da Frontex, l’Agentura europeica per la cooperaziun operativa als cunfins exteriurs, èn 25'000 fugitivs arrivads en l’Italia. Quai èn 12% dapli ch’anc il mais avant.
Ils blers derivian da la Nigeria e da l’Eritrea. Uschia èn ils emprims 7 mais da l’onn 95'000 fugitivs arrivads en l’Italia.
Percunter ha la Grezia dumbrà il fanadur 97% damain fugitivs ch’anc avant in onn. Quai pervi da la cunvegna davart ils fugitivs tranter l’Uniun europeica e la Tirchia.
RR novitads 22:00
