Siglir tar il cuntegn
Inhalt

Exteriur Front National perda elecziuns regiunalas en Frantscha

En la segunda runda da las elecziuns regiunalas en la Frantscha na van naginas regiuns en ils mauns dal Front National. 7 da las 13 regiuns van a las forzas conservativ-burgaisas cun l'anteriur president da stadi Nicolas Sarkozy. Quai mussan cifras dal ministeri da l'intern franzos.

Marion Marechal-Le Pen, la nezza da Marine Le Pen.
Legenda: Marion Marechal-Le Pen è trumpada cura ch'ella annunzia ils resultats per la regiun Provence-Alpes-Cote d'Azur. Reuters

Ils socialists dal president actual François Hollande gudognan ensemen cun lur alliads en 5 regiuns. E l'insla Corsica vegn manada dals naziunalists cors. La participaziun a las elecziuns è stada tar radund 59%.

Avant in'emna era la partida da l'extrema dretga Front National anc daventada la pli ferma forza en la Frantscha cun 28% da las vuschs.

Era pers las elecziuns ha la manadra dal Front National Marine Le Pen en la regiun Nord-Pas-de-Calais-Picardie, e quai cun 42% fin 43% cunter il candidat dals Conservativs Xavier Bertrand.

Victurs admonescha da dar adatg

Malgrà ch'il Front National na vegn probabel betg ad avair las bleras vuschs en ina da las regiuns, discurran las grondas partidas ch'i saja da dar adatg. Tenor il Socialist Manuel Valls n'è il privel da la dretga betg stgatschà. Il schef dals Conservativs, Nicolas Sarkozy, ha admonì a tuttas partidas d'uss dar resposta a la dretga per ils quitads dals Franzos.

Tge muntada han las elecziuns regiunalas?

Per la glieud ha resultat da las elecziuns diversas consequenzas concretas. Las regiuns èn tranter auter responsablas per la promoziun economica, per l’educaziun professiunala e per part per las scolas. Er organiseschan ellas il traffic local da tren e bus ed èn plinavant activas quai che pertutga la promoziun da cultura.

Las elecziuns regiunalas han dentant cunzunt ina muntada simbolica per il palancau naziunal: per l’ultima giada avant las elecziuns presidialas la primavaira 2017 hai lieu ina votaziun a l’urna. Perquai valan las elecziuns regiunalas sco barometer principal per la tendenza politica.

RR novitads 09:00 / 21:00 / 06:00+