Siglir tar il cuntegn
Inhalt

Exteriur Frantscha paja enavos a la Svizra 40 milliuns francs

Suenter lungas dispitas paja la Frantscha enavos a la Svizra l'auter onn 41,5 milliuns francs. Uschia han ils dus pajais reglà ina lunga dispita giuridica davart l'agid social per burgais dal stadi franzos che vivan en Svizra. Quai han confermà las autoritads ad SRF.

Ignazio Cassis e Jean-Yves le Drian dattan il maun.
Legenda: Ignazio Cassis ha discutà ils 19 da december 2017 cun ses collega d'uffizi Jean-Yves le Drian. Keystone

La plipart da la summa retschaivan ils chantuns, cunzunt il chantun Vad ed il chantun Genevra. Il cusseglier guvernativ da Genevra Mauro Poggia ha contractà per ils chantuns svizzers cun la Frantscha.

Cunvegna antiquada

Il resultat da las tractativas suonda ad ina cunvegna d'agid social ch'è vegnida schliada suenter 90 onns. Per quai aveva il minister per l'exteriur Ignazio Cassis entupà ils 19 da december 2017 ses collega d'uffizi franzos Jean-Yves le Drian a Paris.

Fin ussa argumentava la Frantscha che questa cunvegna saja antiquada dapi la cunvegna davart la libra circulaziun da persunas da l'onn 2002. La cunvegna reglava che la Frantscha pajava enavos a la Svizra tschertas prestaziuns d'agid social. Quai sche Franzos che vivevan en Svizra retiravan agid social da la Svizra u cuntrari.

Tenor SRF sto la Svizra pajar a la Frantscha 3,5 milliuns francs per Svizzers che retiran agid social en Frantscha.

RR novitads 09:00