Avant ch'i possia dar ulteriurs cravals da demonstrants cun vestas melnas – ils «Gilets jaunes» – agescha la regenza franzosa cun in'ulteriura concessiun. Il schef da stadi franzos Emanuel Macron ha suspendì l'auzament da la taglia sin benzin e diesel per l'entir onn 2019. Mesemna saira aveva il primminister franzos anc discurrì da suspender l'auzament per mez onn.
Uschia ha Macron ademplì ina da las pretensiuns principalas da la gruppa da protesta «Gilets jaunes» ch'organisescha protestas gia dapi pliras emnas. Tar las protestas da la fin d'emna passada era la situaziun lura escalada fin a cumbats averts cun policists.
Il schef da stadi Emanuel Macron ha appellà a la politica, sindicats e patruns da s'engaschar per quietar la situaziun. Suenter ina sesida dal cabinet n'ha il pledader da la regenza Benhamin Griveaux betg sclaus ch'ins pudess clamar il militar per calmar la situaziun.
Moviment diffus e dividì
Per la fin d'emna che vegn han ils «Gilets jaunes» clamà ad ulteriuras protestas en la chapitala franzosa Paris. Il moviment ch'ha ses num tras las vestas melnas en ils autos n'è betg inizià da partidas u sindicats – mabain sa mobilisescha surtut tras medias socialas. Ina gruppa heterogena senza organisaziun clera. Uschia aveva quai dà smanatschas aifer il moviment, smanatschas vers ina gruppa da «Gilets jaunes» ch'era pronta a discurs cun la regenza.
RR novitads 06:00
