Siglir tar il cuntegn

Exteriur Frantscha – Di da partida dal Front National

Il Front National duai en futur avair num «Rassemblement national» e Marine Le Pen resta scheffa da la partida.

Marine Le Pen al di da partida.
Legenda: La partida da Marine Le Pen duai en futur avair num «Rassemblement National». Keystone

Marine Le Pen ha proponì al di da partida dal Front National a Lille da midar il num da la partida en «Rassemblement national». Cun midar il num, vul Le Pen avrir la partida per coaliziuns – quai en vista a las elecziuns per il parlament europeic dal 2019. La basa da la partida decida las proximas emnas davart questa midada da num.

Marine Le Pen resta scheffa da partida

Ultra da quai è Marine Le Pen vegnida confermada sco scheffa da partida. La politicra da 49 onns è stada la suletta candidata per il presidi da la partida da l’extrema dretga. Ella è dapi il 2011 scheffa dal Front National.

Al di da partida han ils commembers plinavant decis da sclauder il fundatur dal Front National e bab da Marine Le Pen, Jean-Marie Le Pen, da la partida. Uschia n’è el betg pli president d’onur da la partida.

RR novitads 17:00