Fin d'alarm suenter ferm terratrembel en Chile

Malgrà ina magnituda da 7,7 n’hai para dà naginas unfrendas e be pitschens donns en il sid dal pajais.

Ina punt donnegiada plain sfessas en il sid dal Chile.

Legenda da maletgs: Er sche questa punt sin l'insla Chiloé è vegnida donnegiada fermamain: En il sid dal Chile èn ins per gronda part mitschà cun la tema. Keystone

  • Il terratrembel ha cuntanschì ina magnituda da 7,7. L’epicenter sa chattava 225 kilometers en il sidvest da la citad chilena Puerto Montt sin l’insla Chiloé.
  • Il servetsch da catastrofas ha puspè schlià ils avertiments per tsunamis.
  • Tenor la protecziun civila n’han naginas persunas pers la vita.

Grond levgiament en il sid dal Chile: Suenter in terratrembel da la fermezza 7,7 para il privel da tsunamis d’esser passà. Il servetsch da catastrofas ha puspè schlià ils alarm correspundents, avertescha dentant d’era vinavant esser precaut.

I na duai betg avair dà persunas blessadas u mortas. Ils donns chaschunads vegnan ad esser pitschens. Avant eran plirs lieus costals vegnids evacuads.

Carta dal sid da Chile.

Legenda da maletgs: L'epicenter dal terratrembel en il sidvest dal Chile. SRF

Adina puspè terratrembels en il Chile

Chile sa chatta a l’uschenumnà ‘rintg da fieu pacific’. A la tschinta da vulcans en furma d’in fier-chaval ch’enserra l’Ocean Pacific fruntan gist pliras plattas continentalas ed oceanicas ina sin l’autra. Cunquai ch’i èn adina en moviment, datti adina puspè terratrembels en il Chile.

Il favrer 2010 eran dapli che 500 persunas mortas en il Chile tras in terratrembel da la fermezza da 8,8, suandà d’in tsunami.

RR novitads 16:00 / 18:00