Siglir tar il cuntegn
Inhalt

Exteriur Fieu «Thomas» furia anc adina en California

L'incendi da guaud, che furia gia dapi bun trais emnas en la California, è entant sa sviluppà tar il pli grond en l'istorgia dals Stadis Unids da l'America.

Fieu en la California.
Legenda: Var 65 pertschient dal fieu en la California è fin uss sut controlla. Keystone

Las flommas da l'uschenumnà incendi da Thomas, en il nord da Los Angeles, hajan entant cuntanschì ina surfatscha da passa 1'100 kilometers quadrat, quai ch'è circa la surfatscha dal chantun Uri, uschia las autoritads via Twitter. L’incendi era rut or ils 4 da december 2017.

Thomas lascha enavos blers donns

Passa 1’063 bajetgs sajan vegnids donnegiads u destruids. Actualmain sajan anc 2'800 pumpiers en acziun. Las autoritads stiman ils donns material gia uss a passa 177 milliuns dollars. Var 65 pertschient dal fieu saja fin uss sut controlla. Ils 14 da december è in pumpier mort tar las lavurs da stizzar en il district Ventura. Gia avant è ina dunna da 70 onns morta sin la fugia dal fieu. Ella ha gì in accident da traffic.

Il pli grond incendi da fin qua aveva destruì il 1932 ina surfatscha sumeglianta en la regiun da San Diego. 15 persunas eran mortas en las flommas. Era ils onns avant hai gia brischà, da quels existan dentant tenor las autoritads da la protecziun cunter incendis naginas datas vardaivlas.

RR novitads 11:00