Fiera da Nadal a Berlin: Merkel è schoccada

Tenor la chanceliera tudestga Angela Merkel supponan las autoritads tudestgas in'attatga terroristica. Ella ha empermess ch'il malfatg vegnia sclerì. Ed Merkel ha era condolà a las famiglias da las unfrendas da l'attatga a Berlin.

Il camiun saja charrà en la fiera: Ils investigaturs discurran d'in probabel act da terror.

Legenda da maletgs: Il camiun saja charrà en la fiera: Ils investigaturs discurran d'in probabel act da terror. Keystone

  • A Berlin è in camiun furià il glindesdi saira en ina fiera da Nadal datiers da la Gedächtniskirche. Almain 12 persunas èn mortas, 48 èn vegnidas blessadas, per part grevamain.
  • La polizia ha arrestà ina persuna suspectada. Il cunautist è mort.
  • Il camiun è oriund da la Pologna, probablamain è el vegnì engulà.
  • Per las 13.00 dad oz mardi è annunziada ina conferenza per ils meds da massa. Il president da la citad da Berlin Michael Müller vegn ad infurmar.

Sco la polizia da Berlin ha communitgà, haja ella arrestà il probabel manischunz dal camiun. Quel aveva manà il camiun en la fiera sin in traject da 50 fin 80 meters. Alura era el l'emprim fugì.

La persuna suspectada è in um da 23 onns dal Pakistan. L'um che ha duvrà pliras identitads è probablamain arrivà sco fugitiv en la Germania. Per la chanceliera tudestga fissi per tuts fitg grev da chapir ch'ina persuna fa ina tala attatga, suenter avair dumandà en il pajais per agid e protecziun.


Laschar ir video «Zusammenfassung der Ereignisse in Berlin»

Resumaziun da SRF

1:36 min, dals 19.12.2016

En il camiun aveva la polizia chattà ina persuna morta. Probabel sa tracti d'in manischunz da la Pologna, il camiun aveva numers polacs. La firma da transport n'aveva dapi las 16:00 gì nagin contact pli cun il manischunz. Il camiun aveva transportà atschal ord l'Italia ed avess gì da stgargiar quel il mardi a Berlin. Il speditur suppona ch'il camiun è vegnì rapinà.

Il schabetg fa endament in'attatga cun in camiun a Nizza la stad passada.

Il president dals Stadis Unids da l'America Barack Obama ha exprimì sia profunda condolaziun durant in telefon cun la chanceliera tudestga. Ses pajais vegnia a far tut per gidar a sclerir quest'attatga. Era condolà a las famiglias da las unfrendas da Berlin ha il president da la Confederaziun Johann Schneider-Ammann.

Ed il futur president american Donald Trump è s'exprimì via twitter sur da l'attatga supponida a Berlin. Per el èsi franc ina attatga.

RR novitads 22:00 ++