Siglir tar il cuntegn
Inhalt

Exteriur Fatschentas flureschan per Samsung

Il nov telefonin da Samsung emplaina la cassa dal concern da la Corea dal Sid. Per l’emprima giada dapi dus onns ha la sparta da telefonins contribuì la gronda part al resultat da fatschenta.

La svieuta dal concern è creschida per bunamain 6% sin 46 milliardas francs.
Legenda: La svieuta dal concern è creschida per bunamain 6% sin 46 milliardas francs. Keystone

Il concern da tecnologia Samsung ha gudagnà marcantamain dapli il prim quartal.

Grazia ad ina buna vendita dal nov model da smartphone «Galaxy S7» saja il gudogn creschì per 12% sin radund 5,7 milliardas francs, communitgescha il concern sidcorean.

Entant ch'il pli grond rival Apple ha per l’emprima giada vendì damain iPhones ils prims trais mais da l'onn ha Samsung pudì augmentar la vendita da smartphones per 42%.

Prognosas optimisticas per proxim quartal

Il resultat positiv pudess cuntinuar il proxim quartal, prognostitgescha il management da Samsung. Però è la fatschenta cun semiconducturs daventada pli flaivla. Ils pretschs per chips da memoria èn pli bass perquai che la dumonda per computers è ida enavos.

RR novitads 08:00