Siglir tar il cuntegn

Header

cuntegn

Explosiun ad Istanbul Dunna inculpada arrestada

En la Tirchia è vegnida arrestada la persuna responsabla per plazzar la bumba ch'ha chaschunà passa 80 blessads e 6 morts ad Istanbul e 21 ulteriurs suspectads. Quai annunzian las autoritads tircas. I dettia colliaziuns tar la PKK, la partida scumandada curda dals lavurers. La dunna arrestada saja sesida 40 minutas sin in banc e s'allontanada curt avant l'explosiun, quai mussian maletgs da cameras da surveglianza.

La regenza tirca fa responsabel curds militants da la Siria per l'attentat cun ina bumba la dumengia ad Istanbul. Il cumond per l'attatga saja vegnì or da la citad da Kobani en il nord da la Siria, ha ditg il minister da l'interiur tirc, Süleyman Soylu. Là ha l'armada tirca attatgà ils davos onns pliras giadas la milissa curda YPG, che vala sco part da la partida scumandada PKK.

Attentat sin via da cumpras

Ad Istanbul hai dà dumengia curt suenter las 14:00 in'explosiun en il quartier Taksim sin la via da cumpras populara Istikal. La televisiun dal stadi Tirc ha mussà purtrets da pliras ambulanzas ch'èn charradas vers il lieu dal delict. La polizia ha evacuà il territori enturn l'explosiun. Tenor il guvernatur d'Istanbul Ali Yerlikaya dettia fin ussa 6 morts ed 81 blessads.

Il motiv da l'explosiun n'è anc betg cler. Il president tirc Recep Erdogan ha discurrì dad ina bumba ed in «attentat malign».

Betg l'emprim attentat

Il 2016 hai dà in attentat da suicidi en il medem lieu. Quatter persunas eran mortas e 39 vegnidas blessadas. Quel attentat era part d'ina seria en Tirchia tranter il 2015 ed il 2017. Baud 500 persunas han pers durant quest temp lur vita e dapli che 2'000 èn vegnidas blessadas.

RTR novitads 16:00

Artitgels legids il pli savens