Siglir tar il cuntegn

Header

cuntegn

Exteriur Expert: «Guerra cunter SI vegn fatga cun meds fallads»

Che las attatgas ord l'aria sin posts dal Stadi Islamic en Siria ed en l'Irac na tanschan betg per dar dumogn a la gruppa da terror, dian plirs experts. Quai che manca sajan schuldads a terra. Ma era quai pudess finir en mal.

Dapi intginas emnas datti novas differentas da la guerra encunter il Stadi Islamic. Ils extremists perdian adina dapli terren ha quai num. L'ultim exempel è la citad da Sindschar ch'è vegnida reconquistada dad ina colliaziun curda. Cumbattants curds s'engaschan oravant tut en la Siria dal nord cun schuldada encunter las truppas dal Stadi Islamic. Ils pajais dal vest e la Russia cumbattan il Stadi islamic però be cun attatgas ord l'aria. Quai saja memia pauc, manegian experts da strategia. In da quels è Markus Kaim, senior fellow al Institut per la scienzià e la politica a Berlin.

Nagin vul trametter schuldads

Ni ils stadis Unids ni la Gronda Britannia, la Frantscha ed era betg la Germania veglian trametter schuldads en la regiun dal Proxim Orient, uschia Markus Kaim. L'alternativa per tuttina vegnir cun dapli schuldads per terra en Siria ed en l'Irac saja da sustegnair anc pli fitg las truppas localas. Vul dir, ils curds en Siria e milissas sunitas en l'Irac. Però era quai na bastia betg per propi dar dumogn al Stadi Islamic.

Nagina varianta è ina schlaiziun

Er sch’ils pajais dal vest, la Russia e l’Iran vegnissan forsa ensemen cun avunda schuldads en la guerra cunter la milissa da terror, ed era sch'ins vegniss da metter a pantun il Stadi Islamic, fissi il resultat forsa betg in bun. Tenor Kaim pudess quai numnadamain capitar il medem sco en l'Afghanistan u en l'Irac, suenter ch’ils Americans ha invadì ils dus pajais suenter ils 11 da settember 2001. L'Irac è oz en stgaglias e l'Afghanistan è vi da dar dapart.

Artitgels legids il pli savens