Siglir tar il cuntegn
Inhalt

Exteriur Exercizi militar – «ina provocaziun envers la Corea dal Nord»

Ils Stadis Unids e la Corea dal Sid han il glindesdi cumenzà cun il pli grond exercizi communabel en l'aria. Durant tschintg dis vegnan 230 aviuns militars e radund 12'000 schuldads a sa participar a l'acziun.

schuldada davant in jet.
Legenda: Ils Stadis Unids e la Corea dal Sid han cumenzà cun il pli grond exercizi militar en l’aria. Keystone

La manevra cun il titel «Vigilant Ace» duai preparar ils dus pajais per in'acziun. Gia il november dal 2016 avevan radund 16'000 schuldads e 200 aviuns fatg part als exercizis militars annuals. Per la Corea dal Nord è l'acziun militara ina provocaziun. La Corea dal Nord aveva avant tschintg dis sajettà in'ulteriura rachetta intercontinentala. Silsuenter ha il reschim proclamà, ch'els possian uss cuntanscher l'entir territori dals Stadis Unids da l'America.

Ils Stadis Unids «batlegian per ina guerra atomara», ha ditg il ministeri da l'exteriur da la Corea dal Nord. Il pajais fa er regularmain la reproscha ch'ils Stadis Unids preparian cun lur manevras militaras ensemen cun la Corea dal Sid in'attatga sin la Corea dal Nord. Quai negheschan dentant tuts dus pajais.

RR novitads 06:00