I sa tractia da veritablas execuziuns, di Rupert Colville da l'aut cumissariat da l'ONU per ils dretgs umans a Genevra. Era 11 dunnas e 13 uffants sajan vegnids mazzads.
Cuntinuadamain acts da sgarschur cunter civilists
Las infurmaziuns retschavidas sajan crediblas. Ils mazzaments sajan succedids probablamain durant las ultimas 48 uras en quartiers d'Aleppo controllads fin uss da rebels.
L’armada siriana e ses alliads èn curt avant la reconquista da la metropola en il nord da la Sirian. Gia avant la battaglia actuala aveva il secretari general da l’ONU, Ban Ki Moon, sa mussà grevamain preoccupà dad acts da sgarschur envers numerus civilists.
Infurmaziuns cuntradictorias davart in corridor dad evacuaziun
Al mument tracta la Tirchia cun la Russia per pussibilitar in corridor per evacuar cumbattants e civilists or da l’enclava dals rebels en l’ost dad Aleppo. Represchentants dals dus pajais s’inscuntran damaun mesemna, ha annunzià il minister da l’exteriur tirc Mevlüt Cavusoglu.
Anc avant aveva dentant detg in represchentant dad ina gruppa da rebels, ch’i na dettia nagins contacts internaziunals per pussibilitar a cumbattants e civilists in passadi liber.
RR novitads 16:00
