Siglir tar il cuntegn
Inhalt

Exteriur Escalaziun en la Venezuela

Il president Nicolas Maduro ha annunzià, ch'i haja dà in'attatga da helicopter sin il tribunal suprem en la chapitala Caracas. I sa tractia qua d'ina emprova da putsch terroristica.

Nicolas Maduro, president da Venezuela.
Legenda: Nicolas Maduro, president da Venezuela. Keystone

En la Venezuela rapporta il president Nicolas Maduro ch'i haja dà in'attatga da helicopter sin il tribunal suprem en la chapitala Caracas. I sa tractia qua d'ina emprova da putsch terroristica. El haja perquai mobilisà l'entira armada, uschia Maduro.

Tenor Maduro hajan dissidents rapinà in helicopter da la polizia e nizzegià quel per l'attatga. Paucas uras avant aveva il president smanatschà a ses adversaris cun in cumbat armà. La refurma da la constituziun planisada vegnia sche necessari realisada cun la forza d'armas.

Maduro planisescha per ils 30 da fanadur ina votaziun per ina refurma constituziunala. Finamira da questa refurma fiss tenor Maduro da surmuntar la crisa dramatica en la politica ed economia dal pajais. Cunter questa refurma datti però protests. Tar tals protests e tumults èn dapi l'entschatta avrigl mortas 77 persunas.

RR novitads 06:00