Siglir tar il cuntegn
Inhalt

Exteriur Erdogan vul prolungar stadi d'urgenza

Suenter la victoria dispitaivla dal president Tirc Recep Tayyip Erdoagn tar il referendum da la constituziun duai vegnir prolungà il stadi d'urgenza en l'entir pajais. Quai ha decidì la regenza tirca ha communitgà il viceprimminister Numan Kurtulmus.

Purtret da Recep Tayyip Erdogan.
Legenda: Erdogan vul prolungar il stadi d'urgenza en Tirchia. Uschia po el reger per decret. Keystone

Avant ha il cussegl da segirezza naziunal medemamain decidì da prolungar il stadi d'urgenza. Formalmain sto il parlament anc acceptar la prolungaziun. Sco motiv haja la regenza numnà ch'i saja «per la segirezza da la democrazia, da la constituziunalitad sco era ils dretgs e la libertad dals burgais». Senza ina prolungaziun fiss il stadi d'urgenza ì a fin la notg sin mesemna.

L'opposiziun crititgescha fermamain questa decisiun. Ella è da l'opiniun che la regenza na saja betg pli capavla da reger il pajais senza il stadi d'urgenza. Ella saja daventada dependenta da quel. Entras il stadi d'urgenza po Erdogan numnadamain reger per decret.

La regenza tirca aveva proclamà il stadi d'urgenza la stad passada suenter il naufragi dal putsch cunter il president. Dapi lura è el vegnì prolungà gia duas giadas.

RR novitads 06:00