Siglir tar il cuntegn
Inhalt

Exteriur Erdogan gudogna elecziun

La cumissiun d'elecziun en Tirchia ha confermà uffizialmain la victoria dal president vertent Recep Tayyip Erdogan. Erdogan haja cuntanschì il pli absolut da vuschs valaivlas.

Purtret dad Erdogan che tegna ils mauns en l'aria.
Legenda: Recep Tayyip Erdogan ha gudagnà las elecziuns per il presidi en Tirchia. Keystone

Il president aveva gia clamà or la victoria curt avant mesanotg, malgrà che betg tuttas vuschs èn stadas dumbradas ora. La cumissiun d'elecziun ha confermà la victoria oz a bun'ura. Lura eran radund 97,7 da las vuschs dumbradas ora. Il rest na possia betg pli midar insatge vid il resultat.

Tenor la cumissiun hajan la partida islamic-conservativa AKP dad Erdogan, la partida naziunala sanestra CHP, la partida procurda HDP e la partida ultradretga MHP surpassà l'obstachel da 10% tar las elecziuns per il parlament. Davart ils resultats exacts n'ha in pledader da la cumissiun dentant anc betg prendì posiziun.

Ultim pass da la transfurmaziun

Cun las elecziuns è finida l'introducziun dal sistem presidial dad Erdogan. Il nov president daventa schef da stadi e da la regenza e survegn plenipotenza da gronda purtada. In primminister na datti en futur betg pli.

Tenor l'agentura da novitads Anadolu haja Erdogan radund 52,5% da las vuschs gia dumbradas ora (radund 99%). Il candidat da la pli gronda partida d'opposiziun CHP, Muharem Ince vegniss segund, cun radund 30% da las vuschs.

RR novitads 06:00