Siglir tar il cuntegn
cuntegn

Exteriur Erdogan declera process da pasch cun ils curds sco terminà

Il president da la Tirchia Recep Tayyip Erdogan ha declerà il process da pasch cun ils curds sco terminà. I na saja betg pli pussaivel da cuntinuar cun in process cun quels che n'acceptian betg l'unitad e l'integritad da la Tirchia, uschia Erdogan envers l'agentura da novitads Anadolu.

Il president da la Tirchia, Recep Tayyip Erdogan.
Legenda: Il president da la Tirchia, Recep Tayyip Erdogan. Keystone

La raschun è il conflict cun la partida curda PKK ch'è s'intensivà ils ultims dis. Tar attatgas da la PKK eran morts dus policists e dus schuldads. Suenter attatgas or da l'aria da la Tirchia, aveva la partida declerà l'armistizi sco terminà. Quel valeva dapi il 2013.

«Ferma solidaritad» en cumbat cunter SI

Entant han ils pajais da la NATO empermess «ferma solidaritad» cun la Tirchia en ses cumbat cunter la milissa da terrur Stadi Islamic. Suenter la sesida extraordinaria a Brüssel ha l'allianza declerà ch'il terrorissem saja ina smanatscha directa per la segirezza dals pajais da la NATO e la stabilitad internaziunala.

Betg menziunà ha l'allianza però l'agir da la Tirchia cunter posiziuns da la partida curda PKK en il nord da l'Irac.

RR novitads 12:00