Exteriur - Er la Russia sgola attatgas cunter il Stadi islamic
Per l’emprima giada ha era la Russia intervegnì cun ses militar en il conflict sanguinus en la Siria. Sco quai ch’il ministeri da defensiun russ ha confermà, han aviuns da cumbat russ bumbardà deposits da muniziun e carburant da la milissa da terrur Stadi islamic datiers da Damascus.
Il president Wladimir Putin ha numnà l’intervenziun da la Russia «la suletta via per pudair cumbatter il terrorissem internaziunal.» La Russia vegnia a sustegnair la regenza siriana enfin la fin dal conflict. La damaun aveva il president russ Wladimir Putin survegnì la lubientscha dal parlament per l'invasiun militara a l'exteriur.
