Gia damaun u mesemna duai arrivar material d'agid e persunal supplementar en la regiun dal terratrembel en il Nepal.
La pli gronda sfida il mument, saja da vegnir en las autras regiuns da devastaziun, ordaifer Katmandu, uschia Manuel Bessler. Pertge las vias e las punts sajan vegnidas destruidas dal tuttafatg. «Ordaifer Katmandu èn las devastaziuns anc pli grondas, entirs vitgs duain esser devastads, tenor emprimas infurmaziuns», di Bessler. «Logisticamain vegn quai a dar ina gronda chaussa.»
Gidar cunzun en il sectur medicinal
I valia ussa da survegnir ina survista da la dimensiun da la catastrofa – ch’è il mument tut auter che survesaivla. La Svizra cun ses gidanters vegnia a sa concentrar cunzunt sin l’agid medicinal.
Quai u cun furnir material sco medicaments e faschas ni cun sustegnair las structuras medicinalas cun endrizzar per exempel bajetgs d’urgenza per sustegnair ils ospitals ch’èn vegnids destruids. In ulteriur punct nua che la Svizra vegnia a gidar saja da procurar per avunda aua da baiver.
