Ils emprims dus dis sajan previs discurs separads tranter las partidas involvidas da CDU, CSU, Liberals e Verds. Il venderdi duaian lura sa rimnar tuts ad ina maisa radunda. Quai è il proceder che la chanceliera tudestga Angela Merkel ha skizzà il glindesdi.
Il cumpromiss da 200'000 liberescha la via a discurs da coaliziun
Pli adura il glindesdi era vegnì enconuschent, che la CDU dad Angela Merkel e la CSU da Horst Seehofer eran sa cunvegnidas la dumengia saira tar il punct il pli dispitaivel: Ensemen han els decidì da fixar la limita d'immigrants ad onn sin maximalmain 200'000. Quai resorta d'in palpiri da cunvegna ch'è en possess da pliras agenturas da novitads.
In bun di per l'uniun ed in bun di per la Germania.
La manadira a trais cun Union, FDP e verds vegn numnada «Giamaica» pervi da las colurs da las trais partidas. Questa coaliziun vegn ad esser ina cumbinaziun nova sin livel naziunal. Sin livel regiunal datti ella dapi intgins mais en il Schleswig-Holstein.
Ina situaziun sco il 2015 cun in fitg aut dumber da fugitivs e migrants na vulan las partidas betg pli. Perquai vulan els elavurar in entir pachet da mesiras. Plirs reglaments èn en Germania gia en lavur.
Da nov è la pretensiun ch'i duai dar en Germania centers da decisiun e da repatriaziun. Là duain ils requirents d'asil restar fin ch'igl è vegnì decidì davart lur dumonda. Requirents d'asil ch'ins ha refusà duain da là davent vegnir manads enavos en lur patria.
Reacziuns dals Verds ed FDP
Il cumpromiss da CDU/CSU en connex cun la politica da fugitivs frunta sin sceptica tar ils partenaris da coaliziun pussaivels. Il schef dals verds, Cem Özdemir ha declerà en la televisiun ZDF, ch'el saja spanegià co CDU/CSU declerian lur cumpromiss. El n'ha dentant betg excludì la coaliziun da Giamaica. La finala saja da chattar in cumpromiss, uschia Özdemir.
La vicepresidenta da la FDP, Marie-Agnes Strack-Zimmermann, ha numnà ils plans da la CDU/CSU ina basa per ils discurs da coaliziun.
RR novitads 06:00++
