Siglir tar il cuntegn

Exteriur En Siria vegni cumbattì vinavant

En la Siria cuntinueschan ils cumbats. Quai malgrà ch'il cussegl da segirezza da las Naziuns Unidas ha ordinà la sonda ina pausa da cumbat dad almain 30 dis.

Devastaziun.
Legenda: 30 dis avess la pausa da cumbat gì da cuzzar. (maletg dal archiv) Keystone

La pausa da cumbat ch'il cussegl da segirezza da las naziuns Unidas ha ordinà la dumengia vegn ignorada: Ils cumbats en la Siria cuntinueschan. Suenter ina notg ruassaivla sin dumengia ha l’aviatica militara puspè bumbardà la regiun en l'ost da Ghouta. Ed i ha dà cumbats tranter gruppas da la regenza e gruppas da l'opposiziun.

Ultra da quai haja probabel dà in'attatga cun gas da clor. Quella haja custà la vita ad in uffant. Quai rapporta il post d’observaziun sirian per ils dretgs umans. El sa referescha ad indicaziuns da perditgas.

Guterres: «Pausa da cumbat sto vegnir resguardada»

Il secretari general da l'ONU Antonio Guterres ha entant pretendì che la pausa da cumbat vegnia resguardada immediat. La resoluziun stoppia vegnir realisada per ch'i possia vegnì furnì l'agid umanitar a Goutha. Ils blessads stoppian vegnir transportads ord la regiuns. «Igl è nairas uras da far ina fin cun l'enfiern sin terra, uschia Guterres.

UE 'inscuntra per discutar la situaziun precara

Ils ministers da l’exteriur da l’Uniun europeica debatteschan oz a Brüssel davart la situaziun precara en Siria. L’Uniun europeica veglia cunzunt examinar co ch'ella pudess evitar meglier che la populaziun pateschia.

In'autra dumonda che vegn a fatschentar ils ministers da l'exteriur è sch'ins possia far dapli squitsch sin la Tirchia. Quai per evitar che la situaziun escaleschia anc dapli. Il schaner aveva la Tirchia cumenzà cun in’offensiva cunter la milissa curda YPG en la regiun dad Afrin en il nord da la Siria.

RR novitads 09:00