Siglir tar il cuntegn
cuntegn

Exteriur En la Cuba è in aviun da passagiers crudà giu

L'aviun è crudà giu en in champ datiers da Havanna, el aveva passa 100 persunas a bord. Il president cuban Miguel Díaz-Canel ch'è stà al lieu da la disgrazia, quinta cun in aut dumber d'unfrendas.

Persunas e restanzas d'in aviun crudà giu.
Legenda: Polizia e schuldada enturn intginas restanzas da l'aviun mexican ch'è crudà giu datiers da la chapitala cubana Havanna. Keystone

L'aviun dal tip Boeing 737 è crudà giu il venderdi da mezdi, curt suenter ch'el aveva bandunà l'eroport internaziunal da Havanna. L'aviun fascheva in sgol en la citad Holguín en la Cuba da l'ost. Tenor il president cuban Miguel Díaz-Canel sa chattavan 104 passagiers e nov commembers da servetsch a bord da l'aviun.

Sco la gasetta da partida cubana «Granma» annunzia, han ins mo chattà trais survivents. Quels sa chattan tenor il rapport dentant en in stadi critic. Tant ils passagiers sco era ils commembers da servetsch na sajan betg Cubans. L'aviun è da la societad aviatica mexicana Damojh, la societad statala cubana al aveva prendì en locaziun.

RR novitads 20.00

Blera glieud al lieu d'ina disgrazia.
Legenda: Bleras persunas èn en acziun al lieu da la disgrazia datiers da la chapitala cubana Havanna. Keystone