Siglir tar il cuntegn
cuntegn

Exteriur En il Giapun ha la terra stremblì

Suenter il terratrembel avant il Giapun han las autoritads schlia l’avertiment da Tsunami per la regiun da Fukushima, quai conferman las autoritads.

In pitschen tsunami sa mussa en in flum.
Legenda: In unda nà da la mar vegn si dad in flum giapunais - las undas suenter il terratrembel, ils uschenumnads «tsunamis», eran dentant bler pli pitschnas sco temidas. Keystone

Para n'haja il terratrembel betg causà donns pli gronds. Ils abitants sajan dentant anc adina avertids da star precauts, quai rapporta in emettur da televisiun giapunais.

sco descretg.
Legenda: La charta da la surveglianza geologica en il Stadis Unids USGS mussa l’epicenter dal terratrembel. Keystone

Era en las ovras atomaras da Fukushima ed en ulteriuras ovras atomaras en regiuns vischinas n’haja quai dà nagins disturbis, conferman las autoritads. Tenor indicaziuns uffizialas èn duas persunas vegnidas blessadas.

Il terratrembel il mardi (temp local) aveva ina fermezza da 7,4

L’epicenter dal terratrembel è stà avant la costa da la provinza Fukushima, en ina profunditad da var diesch kilometers. Chasas en la chapitala Tokio ed en autras regiuns dal pajais han balluccà, annunzian perditgas.

Fukushima - nagins donns pli gronds

L' avertiment da tsunamis, dals quals grondas parts da la costa pacifica dal nord avevan tema, è vegnì schlià entant. L'avertiment da tsunamis valeva era per la regiun Fukushima. Là eran morts il mars 2011 passa 18'000 umans pervi d'in terratrembel ed in tsunami.

En la regiun da Fukushima sa chatta era la ruina d'in reactur nuclear ch'era vegnì destruì tras il terratrembel. Il gestiunari da l'ovra atomara Tepco annunzia che la ruina atomara da Fukushima na saja betg vegnida donnegiada pli fitg.

RR novitads 23:00++