Emprimas baras da l’aviun crudà èn chattadas

Las equipas da salvament han chattà las emprimas baras da l'aviun da la Germanwings ch'è crudà giu avant 2 dis en las alps franzosas, quai ha in pledader da la polizia communitgà

In helicopter e persunas da salvament al lieu d'accident.

Legenda da maletgs: Quantas baras ch'èn vegnidas chattadas, n'è dentant betg cler. Reuters

Il pledader n'ha dentant betg precisà quantas baras ch'ins haja gia chattà. La gasetta «New York Times» scriva ch'in dals 2 pilots haja bandunà il cockpit curt avant l'accident. El n'haja betg pudì turnar anen. Sin las registraziuns ch'ils experts èn vi dad eruir saja d'udir in pitgim vi da l'isch. La «New York Times» sa referescha sin in investigader, numna dentant betg el per num.

Las autoritads d'inquisiziun franzosas n'han betg prendì posiziun en chaussa.

RR novitads 7:00