Raschun per l'admoniziun dal nov president Wolfgang Schäuble era la tema dad in eclat pervi da l'elecziun dals sis vicepresidents dal Bundestag. In dals candidats è Albrecht Glaser da la partida da dretga AfD.
Il nov president dal Bundestag Wofgang Schäuble ha 75 onns ed era il sulet candidat per quest uffizi. Il president dal Bundestag è il segund aut uffizi en Germania. Quai suenter l'uffizi dal president da la Republica Federala Tudestga, dentant avant l'uffizi da chancelier u chanceliera.
Il candidat da l'AfD n'è betg giavischà da las autras fracziuns
Enfin uss ha il parlament tudestg bain elegì, dentant mo ils auters tschintg vicepresidents. Albrecht Glaser n'ha betg fatg avunda vuschs. Ils politichers da tut las autras fracziuns avevan numnadamain annunzià gia avant las elecziuns da betg vulair eleger il candidat Albrecht Glaser da l'AfD sco vicepresident.
Il politicher da la partida dretga vegn refusà da tuttas varts pervia da sias remartgas davart l'islam.
Schäuble appellescha a «dispita democratica»
En ses emprim pled sco nov president dal Bundestag ha Wolfgang Schäuble perquai gia appellà als deputads dad avair respect vicendaivel. Ina dispita democratica saja necessaria, dentant na duajan ils deputads betg perder la stima in da l'auter.
Plinavant renda Schäuble attent da respectar la voluntad dals electurs tudestgs.
RR novitads 14:00
