Siglir tar il cuntegn
Inhalt

Exteriur Emprima racheta parta da nova staziun spaziala en Russia

La segund’emprova è gartegiada: Da la staziun spaziala russa Wostotschny è per l'emprima giada partida ina racheta da Sojus en l'univers. Cun quest pass vul la Russia scriver in nov chapitel en si’istorgia astronautica.

La racheta dal tip Sojus davant in fund blau cun nivels grischs.
Legenda: La racheta da Sojus è partida vers l'orbit terrester - l'emprima staziun spaziala da la Russia è inaugurada. Keystone

Per l’emprima giada è partida ina racheta da la nova staziun spaziala Wostotschny en Russia. A bord da la racheta èn trais satellits che duain cuntanscher l'orbit terrester. Oriundamain avess la racheta gia gì da partì la mesemna. Pervi d’in ventil defect è la partenza però vegnida spustada.

Project prestigius

Wostotschny sa chatta en la Siribia datiers dal cunfin chinais ed è in project da prestige dal president russ Wladimir Putin.

L’inauguraziun da Wostotschny na vala però betg mo per la Russia sco term impurtant. En l’avegnir duain er astronauts da la NASA (America) e da l’ESA (Europa) partir da Wostotschny en l’univers.

Independenza da veglia staziun Baikonur

La construcziun da la nova staziun spaziala ha durà bun sis onns. Igl è l’emprima staziun spaziala che sa chatta sin territori russ.

Ed ella munta per la Russia independenza dal cosmodrom Baikonur en il Kasachstan. Per lez paja la Russia mintg’onn 100 milliuns euros fittanza, quai anc fin il 2050.

RR novitads 06:00